Tiampo

O tiampo ta yo ye chel que me se regala en as mans. E o millor que me’n queda ye a fredor en os didos.

Ye per isto que quasi ixublidé iste blog.

Facié de mayestro en Fablans Zaragoza os sabados de maitins. Faina bien dura, per as horas, as nueis sin dormir. Pero bien polida per veyer que encara bi ha chent que quere conoixer ista luenga.

Tamién empentemos una faina de zero. Fer clases d’aragonés en María de Uerba. Mái no s’heba feito cosa parellana. Teneba dubdas de per qué fer-lo, de cómo fer-lo e de si fer-lo u no. O tiampo china-chana lo dixó claro. Vága-le que sí. Tot un acierto. En un lugar de 5 000 habitadors facioron o curso de “Introducción a la luenga aragonesa” 8 alunnos. (No m’esmaxino a més de 1 000 personas aprendendo aragonés en Zgz City).

Como deciba, estianyo que remata me se ye ito en treballar, fer clases d’aragonés y més que més en cudiar, vivir e convivir con os aimors d’a mía vida.

Me ferba asabelo goi poder continar con iste blog, e prebaré de fer-lo. Pero si bella cosa soi aprendendo, ye que a vida ye ta vivir-la.